ကျားဖောင်၊ မြန်မာ့ပင်လယ်ထက်က လောင်မြိုက်ဆဲ ငရဲခန်းများ - Bees Media Myanmar

ကိုအေးမျိုးကို စတွေ့ချိန်က ဝါးခြမ်းပြား ကျိုးတို့ကျဲတဲ ခင်းထားတဲ့ ခနော်နိခနော်နဲ့ ဓနိမိုး ထရံကာ တဲအိမ်လေးထဲမှာပါ။

ဖောင်လုပ်သားဆိုလို့ သန်သန်မာမာ လူလို့ ထင်ထားခဲ့တာ…

တကယ်တမ်းကျ အသက် ၂၅နှစ် အရွယ်နဲ့ ဒုက္ခိတဖြစ်နေတဲ့ လူတယောက်ကို တွေ့လိုက်ရတာပါ။

ဖူးယောင်နေတဲ့ မျက်လုံး နဲ့ နှုတ်ခမ်းတဝိုက် အညိုအမဲကွက်တွေ ခန္ဓာကိုယ်ပေါ်က ဒဏ်ရာဒဏ်ချက်တွေ နဲ့ တဆစ်ဆစ်ကိုက်နေတဲ့ ခါးဆစ်ကြောင့် သူ အဆက်မပြတ် ညည်းညူနေပါတယ်။

ဘယ်ဘက် လက်မကလည်း အဆစ်တဆစ်ပြတ်နေပြီး ဒါက အလုပ်လုပ်ရင်း ထိခိုက်ခဲ့တဲ့ ဒဏ်ရာ လို့ ပြောပါတယ်။

တဲပေါ်တက်လာတဲ့ လူစိမ်း ကျမကို တွေ့တော့ အံ့သြတကြီး မျက်လုံးတွေနဲ့ ကြည့်လိုက်ပြီး အိပ်ရာကထဖို့ လှုပ်လှုပ်ရှားရှား ဖြစ်လာပါတယ်။

ဘေးမှာရှိတဲ့ မိခင်က သူထိုင်နိုင်ဖို့ ဝိုင်းကူထူပေးတာတောင်မှ အတော်လေး အားယူထပြီး ခဏလောက် အမောဖြေ နေပါတယ်။

ကိုအေးမျိုးဟာ မြန်မာနိုင်ငံက လူတွေ မရှိမဖြစ်စားသုံးကြတဲ့ မျှင်ငါးပိ ပုစွန်ခြောက် ငါးခြောက် ထုတ်လုပ်ရေး လုပ်ငန်းခွင်က လုပ်သားတဦး ဖြစ်ပါတယ်။

တစ်နိုင်ငံလုံးက မျှင်ငါးပိ ငါးခြောက် ပုစွန်ခြောက် ထုတ်လုပ်မှု ၆၅ ရာခိုင်နှုန်းကျော် က ဒီလုပ်ငန်းခွင်တွေကနေ ထွက်ရှိနေပြီး ပြည်တွင်းစားသုံးမှု အပြင် ပြည်ပ ကို လည်း တင်ပို့နေရပါတယ်။

မြန်မာနိုင်ငံရဲ့ ငါး၊ ပုစွန် ပြည်ပ တင်ပို့မှုဟာ သတ္တုတူးဖော်ရေး နဲ့ ရေနံ သဘာဝဓာတ်ငွေ့ လုပ်ငန်းတွေ ပြီးရင် စတုတ္တနေရာမှာ ရှိနေပါတယ်။

၂၀၁၇-၁၈ ဘဏ္ဍာနှစ်အတွင်း ရေချို နဲ့ ပင်လယ်ထွက် ငါး၊ ပုစွန် ငါးခြောက် ပုစွန်ခြောက် မျှင်ငါးပိ စတဲ့ ရေထွက် ပစ္စည်း ပြည်ပတင်ပို့မှုဟာ နှစ်ပေါင်း ၂၀ အတွင်း စံချိန်တင် အများဆုံး ဖြစ်ခဲ့ပြီး အမေရိကန် ဒေါ်လာ ၇၁၁ သန်း ကျော် ရခဲ့ပါတယ်။

အများဆုံးတင်ပို့ခဲ့တဲ့ နိုင်ငံတွေထဲမှာ ထိုင်း၊ တရုတ် နိုင်ငံတွေ ဖြစ်ပြီး အမေရိကန်ဒေါ်လာ ၂၅၈ သန်း နဲ့ ၁၉၇ သန်း ကျော် ခဲ့ပါတယ်။

စင်္ကာပူ၊ မလေးရှား၊ ဆော်ဒီအာရေဗျ၊ ဂျပန်၊ အမေရိကန်ပြည်ထောင်စု၊ ယူအေအီး၊ ယူကေ နဲ့ ဘင်္ဂလားဒေ့ရှ် နိုင်ငံတွေဟာ လည်း အများဆုံး တင်ပို့နိုင်တဲ့ နိုင်ငံတွေ စာရင်းမှာ ပါဝင်ပါတယ်။

ဒါတွေ ထွက်ရှိနေတဲ့ အထဲပါတဲ့ ဧရာဝတီတိုင်းထဲက ကျားဖောင်လုပ်ငန်းခွင်ကတော့ လူ ၃၀၀ နီးပါး အသက်ပေးပြီး အလုပ်လုပ်နေကြရတဲ့ မြန်မာနိုင်ငံက ငရဲခန်းတစ်ခုလို့တောင် ပြောနိုင်ပါတယ်။

ဖျာပုံခရိုင်၊ ဖျာပုံမြို့ နဲ့ အမာမြို့နယ် တွေထဲက နောက်မီး၊ ကဖျက်၊ ဗံဒါပင်၊ ဒေါ်ညိမ်း၊ ကုလားထိပ်၊ ချောင်းဝ၊ ဘုန်းကြီးသောင်၊ ဖျာပုံမြစ်တန်း ရွာတွေဟာ ကျားဖောင်တွေနဲ့ ပင်လယ်ပြင် ငါးဖမ်းထွက်တာကို မိရိုးဖလာ ဓလေ့ အနေနဲ့ အကြီးအကျယ် လုပ်ကိုင်နေကြတာ ဖြစ်ပါတယ်။

Leave a Comment